Partindo da tradición oral e do legado das cantareiras e pandeireteiras, este dúo formado por Sara (voz e percusión) e María (voz, percusión e piano) continúa a expansión da música popular galega a través dos ritmos urbanos do século XXI con tan excelentes resultados como os precedentes de Fluzo, Malandrómeda, Baiuca, Tanxugueiras etc. O seu primeiro disco, “ACRÓPOLE” (Tremendo Audiovisual, 2023), confirmou as expectativas depositadas nas dúas artistas viguesas e, con toda seguridade, afianzaraas como as novas herdeiras do activismo lírico e musical do pop galego.

A banda de raíces colombianas, fincada en Nova York, é unha pista máis deste extenso catálogo que reúne outra época dourada da cumbia e o tropicalismo no século XXI. Desde o 2016, esta aventura sónica, futurista e alegórica en contra da persecución aos marxinados foi precipitando nos integrantes de Combo Chimbita un sedimento de espiritualidade que tamén se reflicte nos cada vez máis dispersos itinerarios e influencias da súa música. Son cubano, joropo, jazz experimental, blues, dancehall, reguetón, trip-hop etc., todas as músicas operan como oracións tribais místicas coas que reivindicar a liberdade e escorrentar o odio. A relevancia das súas raíces afrocaribeñas, os cánticos chamanes e os tambores reforzan esta conexión entre a súa música, o territorio e as novas xeracións que buscan un significado –un sentido–, á súa cultura máis aló do marco xeográfico latinoamericano. Estrea en Galicia.

Dal:um é unha parella de mulleres – Suyean e Hyeyoung– que se coñeceron aos oito anos de idade e desde entón compartiron a súa paixón pola música tradicional. No ano 2018, decidiron desafiar as posibilidades sonoras dos seus instrumentos de corda e emprenderon este proxecto de exploración. O significado de Dá:lum quere dicir “seguir perseguindo algo”, aínda que tamén podería significar “diferente” porque a súa música representa os sons de dous instrumentos similares pero á vez diferentes. Son os dous instrumentos máis coñecidos de Corea, o geomungo ─a súa orixe remóntase aos séculos IV e VII─, e o gayageum ─unha cítara punteada con 12 cordas─.  “A música de Dal:um provén do baleiro”, di Hyeyoung. “Estivemos traballando para crear un equilibrio entre o son orixinal das cordas de seda e a beleza do baleiro. É fácil obsesionarse con encher os espazos en branco cando se quere expresar algo, polo que sempre tratamos de non encher as cousas a treo”. Unha viaxe!  Estrea en España. 
 

Desde París chega este cancioneiro excitante, cruzamento de culturas e estilos do mediterráneo. Ao-Qasar é unha mestura explosiva de ritmos árabes -música clásica, o música tsar de Exipto ou o gnawa de Marrocos–, psicodelia global e o música transo do norte de África que eles chaman “fuzz árabe”. 
Entre os invitados para tocar no seu último disco do 2022, votado por algúns medios entre os mellores discos do ano de “world music”, atópanse Le Ranaldo (Sonic Youth) e Jello Biafra (Dead Kennedys). Ao-Qasar crea esta banda sonora do rock moderno como homenaxe ao barrio parisiense de Barbès, lugar no que se fundou o grupo e que é un exemplo da diversidade cultural e étnica inherente ás cidades contemporáneas. Estrea en España.

Faizal Mostrixx é un artista polifacético que comparte con outros creadores contemporáneos do continente africano –a punta do iceberg é o selo ugandés Nyege Nyege Tapes– esa corrente sonora chamada afrofuturismo.  Xa sexa a través da súa brillante carreira coa danza –por exemplo cos bailaríns do Teatro Nacional de Kampala–, ou gravando discos –o seu traballo máis recente foi publicado pola  prestixiosa Glitterbeat–, Faizal Mostrixx toma prestados os códigos e rituais culturais do seu país para reinventarlos e compartilos co resto do mundo. Hip hop, dubstep, afro-funk, dance, techno ou gravacións de campo converxen nunha obra repleta de mutacións corroborando o excelente momento creativo da música africana. Estrea en España.

Aralola Olamuyiwa é a segunda proposta gañadora do Festival Cara a cara que este ano tivo como país convidado a Nixeria. Ara é unha icona cultural no seu país. Cantante e bailarina, actuou ou colaborou xunto a estrelas internacionais como Stevie Wonder, Femi Kuti, Burna Boy etc., pero sobre todo soubo facerse un oco dentro dun complexo mundo tribal que ata hai uns anos estaba relegado aos homes. É o poder do instrumento e medio de comunicación máis primitivo da humanidade: os tambores parlantes –talking drums–. O tambor africano é parte integral da súa evolución cultural e o principal obxectivo de Ara pasa por contar a súa historia e como boa parte da música occidental que chegou ata nós provén deste legado. Entre excitantes percusións e ritmos, a música de Ara Queen of Drums é un percorrido por boa parte do funky e do afrofunk do século XX. Benvida!

Un griot é un poeta, un narrador de historias que coñece moitas cancións tradicionais e, tamén, conta coa habilidade de improvisar sobre acontecementos actuais. Avalanche Kaito é a unión dun griot urbano e multi-instrumentista, Kaito Winse –Burkina Faso–, co dúo belga de punk rock Benjamin Rapaz e Arnaud Paquotte. Eles son, segundo as súas propias palabras,  “unha explosión sónica ingobernable e inesquecible creada pola intersección de viaxeiros descarriados”. O proxecto do trío sostense sobre os proverbios ancestrais e a tecnoloxía. As tradición oral dun griot de África Occidental converxe co post-punk belga de maneira explosiva.

Cun EP este artista non binario de Bristol espertou as mellores críticas e recensións da prensa especializada e de medios como a BBC. Orgulloso das súas raíces xamaicanas, o son dancehall e a música rave, Grove combina a excitación e o poder do ritmo con letras inspiradas en Angela Davis, a escritora e activista marxista queer. Na súa curta traxectoria musical, deu mostra da súa facilidade para compoñer clásicos dirixidos á pista de baile mesturando os sons xélidos da música industrial coa calor do ritmo dub jamaicano. A combinación de breaks e ritmos máis escuros co techno e a música tradicional lévanos a outros artistas que estiveron no seu horizonte. Tensión e enerxía no escenario.

Esta arqueóloga andina dos sucos de vinilo e apaixonada do afro-tropicalismo latino é o rexurdimento da exploradora sen compás que se mergulla guiada polo seu gusto musical exótico máis que polas tendencias “influencers”. Marabillosamente ecléctica e cun gusto exquisito, a gran pregunta que nos facemos nas súas sesións é ... De onde sae esta música? Co set de DJ Sonido Tupinamba pecharemos esta edición do Sinsal na illa de San Simón.