A casete, o soporte sonoro máis difundido e importante na historia do século XX, volveu e está de moda, e débese a que, á parte de ser máis sostible e barato, permite o control sobre a edición, a produción e a distribución. A mostra recolle xoguetes do pasado e tamén presenta algúns proxectos de diferentes partes do mundo que están a recuperar e protexer estes arquivos en perigo. A exposición complétase cun taller a cargo da investigadora Sarah Rasines que, en pouco tempo, presentará a primeira tese doutoral dedicada á importancia da casete en España. 

Instalación que revive a primeira jukebox –tamén coñecida como gramola, rockola ou máquina de discos– instalada nun espazo público a fináis do século XIX. Foi un 23 de novembro do ano 1889, en San Francisco. A jukebox consiste nun fonógrafo automático que reproduce un cilindro fonográfico e sustitúe a campá acústica por unha instalación de auriculares por tubo. Con este enxeño mecánico, era posible que entre 10 e 12 persoas escoitaran música gravada ao mesmo tempo.

Durante os tres días do festival programaremos unha serie de sesións en aberto onde as persoas interesadas recuperarán ese momento. 

Que conforma ou define unha paisaxe? De cantas formas podemos imaxinar unha illa? Que cores, texturas ou formas tería? Cal sería o son desa illa? Illas Imaxinadas: laboratorio de paisaxes visuais e sonoras é un obradoiro para todos os públicos para a creación de ambientes visuais e sonoros a través de diferentes procesos, dispositivos e artefactos. Impartida por Arte y Garabato, é unha proposta, con perspectiva lúdica, na que as e os participantes experimentarán coa luz e o son como ferramentas de creación e transformación, coa intención de activar unha mirada atenta e unha escoita profunda. 

As e os menores sempre deberán estar acompañados por unha persoa adulta. Haberá 20 prazas por sesión que se adxudicarán por orde de chegada. 


Amarturmar é unha asociación de homes e mulleres do mar que compaxinan a súa actividade profesional con esta iniciativa cultural. Durante todo o ano, ofrecen fermosos e suxestivos sendeiros cos que nos podemos aproximar ao marisqueo, ese traballo tan duro coma fermoso que no seu día cativou o mestre da fotografía Sebastião Salgado. Tamén paseos en barco pola enseada de San Simón, onde ensinan distintos tipos de pesca, e, sobre todo, o Roteiro do Choco. A Sinsal tráennos a outra mirada, desde a illa como sentinela, e contarannos a diversidade mariña do lugar, os seus recursos e as súas principais ameazas.
 

Inscricións no Punto de Información de San Simón.

A caixa-libro da Escola Sinsal é un taller impartido pola artista Sarah Rasines dividido en dúas partes. Por unha banda remataremos o deseño dunha caixa-libro con materiais achegados polo arquivo de Sinsal –postais, flyers, obxectos da Escola Sinsal– e, por outro, aprenderemos a facer un loop con cinta de casete. 

Durante unha hora descubriremos algúns dos segredos sonoros da casete –e do disco– e aprenderemos a crear sons cos que poderás transformar este soporte nun verdadeiro instrumento musical. Tampouco nos esqueceremos do máis importante: reivindicar a imaxinación de Fluxus e con eles reclamar a diversión sensorial: olfacto, gusto, tacto, vista e oído.

Obradoiro recomendaro para todos os públicos (os menores deberán ir acompañadas de persoas adultas). Haberá 8 parellas por taller . Para poder participar será necesario enviar un correo a sarahrasiness@gmail.com indicando nome e apelidos das participantes, teléfono de contacto e día ao que queren asistir. 

Ao longo de toda a fin de semana terán lugar diferentes rutas -duns 30 minutos- en pedal surf arredor do perímetro da illa para coñecer máis de perto o seu patrimonio natural. Trátase dunha actividade náutica innovadora e 100% sostible, na que as e os participantes poden practicar este deporte á vez que escoitan os concertos desde unha táboa estable e segura desde o primeiro momento: pódese participar nesta actividade sen necesidade de coñecemento previo e cada grupo estará acompañado sempre dunha persoa cualificada para o desenvolvemento da actividade.

Idades recomendadas: a partir de 5 anos. As e os menores deberán estar acompañadas da ou do titor legal -con máis de 16 anos deberán ter autorización asinada-. Imprescindible saber nadar e facer uso do chaleco con camiseta.

Método de inscrición: entrada de pago (até o 20 de xullo).
- Menores entre 5 e 9 anos (como pasaxeiros con nais e pais): gratuíto
- Menores entre 10 e 16 anos que compartan táboa (máximo 120 kg): 10 euros. 
- A partir dos 10 anos: 15 euros
- Parellas: 25 euros (12,50 euros por persoa).
- Grupos de 4 a 8 persoas: 10 euros. 
- A partir do 21 de xullo: 20 euros por persoa.