Adriana Proenza chega a Tui ao 15º Play-Doc o vindeiro domingo 7 de abril da man do Festival Sinsal SON Estrella Galicia, un evento irmandado co festival de cine tudense na súa vontade de descubrir talento creativo, nun ambiente relaxado e coa proximidade do público. A xornada de clausura do Play-Doc comezará coa música de Proenza o domingo 7 de abril, no paseo fluvial de Tui, ás 13h. Até as 16:30, música en directo, petiscos, bebidas e sesión DJ Sinsalaudio.

Adriana Proenza é o exemplo de artista que crece de forma autónoma dentro do escenario virtual que delimitan redes sociais como SoundCloud, onde o intercambio e o descubrimento musical son prioritarios. É nesta rede onde contacta cun grupo de produtores que a conducen á colaboración con Corey (masked man), do que xa admiraba as súas bases e co que escribe “Songs I wrote with Corey”. Desde hai cinco anos, Proenza escribe cancións e colabora con diferentes artistas; singles como “Rush” (máis de medio millón de escoitas en Spotify), “Sing with U”, “About this place” ou “Stand by me” foron o preámbulo deste primeiro EP.

Proenza, con só 18 anos móvese de forma dinámica entre o R&B contemporáneo e calquera variante da música pop descuberta polo seu incansable apetito musical. As súas influencias, de Ella Fitgerald ao admirado Mac DeMarco; Proenza di que na maioría das cancións que escribe é posible atopar a esencia da música da década dos oitenta. O pasado outono foi teloneira en Madrid do hip hopeiro estadounidense de orixe sudanesa, Oddisee, para un aforo xa de preto de mil persoas e en 2019 xa está confirmada a súa participación en festivais como o Low de Benidorm. O domingo 7 de abril verémola por vez primeira vez en Galicia, na sesión que Play-Doc e Sinsal SON Estrella Galicia (San Simón, Redondela, do 25 ao 28 de xullo, 2019) propoñen para a xornada de clausura do festival de cine.