A Escola Sinsal presenta unha exposición de cómic que recompila e divulga a historia do son e da música gravada en Galicia a través de 16 personalidades do país que tiveron relación coa mesma, e que abrangue desde o século XVII até o século XX. 
 

O roteiro Descubre San Simón é un itinerario independente ideado polo festival para que coñezas a memoria da illa mediante distintos paneis que se atopan espallados pola mesma. A través dun código QR, obterás información en galego, español e inglés das sete estacións: A roca de San Simón, Proxecto Trobadores, A avenida de Teruel, A paisaxe de Alejo Yáñez Andrade, O aeroporto marítimo de San Simón, A conexión de San SImón e o Pórtico da Gloria e a nova estación dedicada á memoria do compositor Reveriano Soutullo e do seu cuñado, Diego San José, preso en San Simón.

As Sesións San Simón son gravacións en cilindro fonográfico realizadas polo experto Aleks Kolkowski. Nelas participan de xeito activo as bandas e solistas que conforman o cartel secreto do festival, e consisten no rexistro dunha canción, de dous minutos, nun cilindro de cera. As sesións son abertas para o público asistente. 
 

Audicións Malmequeres presenta "En el calor de la noche, programa de Radio Minuto entre 1988 e 1990".  Isabel Díaz e Pedro Blázquez, dous xornalistas históricos da cultura de clubs con innumerables proxectos e programas especializados en RNE –Radio 3 e Radio 4 Catalunya–, ou na Cadena Ser, lembrarán os inicios da chegada da música de baile a España na pioneira Radio Minuto de Barcelona entre os anos 1988 e 1990. 

Unha formación dun cuarteto de saxofóns da Orquesta Clásica de Vigo revisará estilos musicais que fixeron bailar as xeracións de galegas e galegos da primeira metade do século pasado. Haberá pezas orixinais, grandes éxitos do momento, xoias preservadas dun arquivo persoal e tamén a memoria da banda de música de Sande (Ourense). 
 

Obradoiro coa chef galega Arián Lozano, quen realizará unha introdución á cociña vexetariana con produtos de mar que proporcionará a conservera especializada en algas de produción ecolóxica Porto Muíños. Acceso libre ata completar capacidade.

Caderno de bitácora é un obradoiro creativo, para todas as idades, que pretende favorece a exploración de linguaxes artísticas. O taller propón a creación dun libro obxecto -a partir das vivencias de cada participante- no que poder rexistrar diferentes diálogos e experiencias estéticas a partir do valor paisaxístico, patrimonial e histórico de San Simón. Inscrición gratuíta no Punto de Información. 
 

Paseo con Amarturmar, a asociación cultural de mulleres e homes do mar de Cesantes, para botar unha ollada á enseada de San Simón desde a experiencia cotiá das mariscadoras e pescadores da parroquia. Coñeceremos a diversidade mariñeira do lugar, mais tamén a súa actividade económica, o papel da economía circular e, sobre todo, como o cambio climático está a transformar os recursos naturais da zona.

Inscrición gratuíta no Punto de Información. 
Saída ás 17:30h desde Enfermería

A sesión Do, re, Bip! é unha idea d’A Escola Sinsal coa colaboración do artista galego multidisciplinar Juanma Lodo. No marco da programación do festival en San Simón, Sinsal propón un obradoiro dirixido especificamente ás familias que asisten ao evento cultural. Durante o taller, o público aprende conceptos básicos sobre a produción musical dixital mediante a manipulación de instrumentos electrónicos. Nomes como sintetizador, caixa de ritmos, sampler, loop, BPM ou calquera efecto de son poranse sobre a mesa. E, como broche dourado, as e os participantes aprenderán a facer música tocando froitas. 

Acceso libre ata completar capacidade. Duración: 50 minutos.