O roteiro Descubre San Simón é un itinerario independente ideado polo festival para que coñezas a memoria da illa mediante distintos paneis que se atopan espallados pola mesma. A través dun código QR, obterás información en galego, español e inglés das sete estacións: A roca de San Simón, Proxecto Trobadores, A avenida de Teruel, A paisaxe de Alejo Yáñez Andrade, O aeroporto marítimo de San Simón, A conexión de San SImón e o Pórtico da Gloria e a nova estación dedicada á memoria do compositor Reveriano Soutullo e do seu cuñado, Diego San José, preso en San Simón.

A Escola Sinsal presenta unha exposición de cómic que recompila e divulga a historia do son e da música gravada en Galicia a través de 16 personalidades do país que tiveron relación coa mesma, e que abrangue desde o século XVII até o século XX. 
 

As Sesións San Simón son gravacións en cilindro fonográfico realizadas polo experto Aleks Kolkowski. Nelas participan de xeito activo as bandas e solistas que conforman o cartel secreto do festival, e consisten no rexistro dunha canción, de dous minutos, nun cilindro de cera. As sesións son abertas para o público asistente. 
 

As Audicións Malmequeres presentan "Radio Medellín". O artista e investigador sonoro Marco 'Apenino' recuperará a súa etapa radiofónica dos anos 90 en Radio Medellín (Santiago de Compostela), o proxecto editorial da desaparecida Sala Nasa ou os artistas que deron forma ao nomeado “rock parrulo”.

Unha formación dun cuarteto de saxofóns da Orquesta Clásica de Vigo revisará estilos musicais que fixeron bailar as xeracións de galegas e galegos da primeira metade do século pasado. Haberá pezas orixinais, grandes éxitos do momento, xoias preservadas dun arquivo persoal e tamén a memoria da banda de música de Sande (Ourense). 
 

O investigador Xoé Lois G. Faílde convídanos a participar no roteiro Illario pantasma, que contará con tres estacións: Espectros botánicos, onde coñecer o corpo fitolóxico da paisaxe; Pantasmas literarios, sobre a pegada difusa do imaxinario da escrita da illa; e Pa(i)saxes esquecidxs, arredor da xenealoxía política soterrada no lugar.

Inscrición gratuíta no Punto de Información de Sinsal en San Simón. O paseo ten unha duración de 50 minutos.

Caderno de bitácora é un obradoiro creativo, para todas as idades, que pretende favorece a exploración de linguaxes artísticas. O taller propón a creación dun libro obxecto -a partir das vivencias de cada participante- no que poder rexistrar diferentes diálogos e experiencias estéticas a partir do valor paisaxístico, patrimonial e histórico de San Simón. Inscrición gratuíta no Punto de Información. 
 

Un encontro entre a terra, o tempo e o saber facer. Neste taller, Xesús Mazaira, o queixeiro e propietario de Airas Moniz —referente da nova queixería galega grazas aos seus galardoados queixos Terra e Savel—, convida a descubrir os segredos dun produto nacido do respecto: vacas en pastoreo, leite crúa, procesos naturais e moita paixón e tradición. Á súa proposta súmase a mel Puramel, un tesouro líquido da Ribeira Sacra lucense, obtido mediante apicultura biodinámica, que coida da colmea e do seu entorno co mesmo mimo co que se coida da terra.