O Festival Sinsal SON Estrella Galicia segue a sumar recoñecementos. Se o ano pasado nos Iberian Festival Awards (os premios da industria dos festivais de música de España e Portugal) acadou o galardón ‘Best Contribution to Equality’, que o sitúa como o evento máis relevante en España pola súa Contribución á igualdade; esta mesma semana recibiu a notificación de que é finalista noutras tres categorías: Mellor festival de pequeno formato, Mellor escenario e Mellor estratexia de comunicación e marketing. 

Ademais, o pasado mes de xaneiro, o Observatorio de la Cultura da Fundación Contemporánea sinalou o Festival Sinsal, no seu informe ‘Lo mejor de la cultura 2023’, como a segunda iniciativa cultural mellor valorada polos profesionais do sector en Galicia; situándose como a proposta musical máis destacada do país por segundo ano consecutivo. A nivel nacional, na clasificación das iniciativas culturais mellor valoradas polo seu compromiso social e desenvolvemento sostible, sube do 15º ao 9º posto da lista, unha mención que referenda o compromiso que o Festival Sinsal mantén cos ODS e o impacto positivo, e que reforza en cada nova edición. Precisamente, o pasado outubro, o evento recolleu o Premio Fest 2023 (outorgado pola industria de festivais en España) pola Sostibilidade ambiental.