(Galego) Esgotadas as entradas de sábado 22 de xullo

Sorry, this entry is only available in Galician and European Spanish. For the sake of viewer convenience, the content is shown below in this site default language. You may click one of the links to switch the site language to another available language.

Saían á venda hoxe martes 24 ás 12h as entradas para cada un dos días do Festival Sinsal Son Estrella Galicia e, en menos de cinco horas, esgotáronse as do sábado. O festival que se desenvolve na redondelá Illa de San Simón do 21 ao 23 de xullo, puxera a pasada semana á venda os abonos de 3 e 2 días, esgotándose nesa mesma xornada. A organización do festival anima ao público a asistir ao Sinsal Son Estrella Galicia o venres 21 e o domingo 23 de xullo, xornada para as que aínda hai entradas dispoñibles en ticketea.

O propio equipo do Sinsal Son Estrella Galicia está sorprendido da demanda de tickets deste ano. Para ilustrar o aumento da mesma, sinalar que en 2016 -o mellor ano de vendas até o momento- as entradas para cada día do festival saíron o día 15 de abril e as do sábado, que foron as primeiras en esgotarse, pecharon a venda o 28 de abril. Trece días frente ás menos de cinco horas que tardaron hoxe martes 24 en venderse a mesma cantidade de entradas. Desde a dirección do festival, disculpas para aquelas persoas que non conseguiron obter a súa entrada de sábado. Tamén é destacable a demanda xa no primeiro día de entradas para venres e domingo, que previsiblemente esgotaranse semanas antes da celebración do festival na illa de San Simón (Redondela).

Do 21 ao 23 de xullo chegarán á illa de San Simón unha vintena de artistas e grupos de diferentes puntos xeográficos e musicais para formar parte dese cartel que só se coñece ao desembarcar. Sábese que, como mínimo, haberá catro concertos o venres 21 en escenarios principais, sete o sábado 22 e seis o domingo 23; as actividades familiares terán lugar sábado e domingo. A novidade 2017 no Sinsal Son Estrella Galicia é o abono conxunto co Milhões de Festa (Barcelos, Portugal). Un abono que permite disfrutar do Sinsal Son Estrella Galicia o venres 21, inclúe desprazamento a Barcelos esa mesma noite, con acceso dúas noites ao festival portugués. Haberá palco Milhões na illa de San Simón e palco Sinsal en Barcelos.

Unha das singularidades do Sinsal Son Estrella Galicia é que o cartel é secreto; si, o público non coñece quen vai actuar até que desembarca en San Simón. O aforo do festival está limitado a 800 persoas cada un dos días. É importante que o que hoxe podemos desfrutar nós, poda continuar no futuro. Por este e outros motivos, Sinsal Son Estrella Galicia afástase da idea de festival multitudinario, ofrecendo unha serie de actividades nun espazo natural onde o público e o seu benestar son un piar central do proxecto. Nas últimas dúas edicións as entradas esgotáronse semanas antes da súa celebración.