(Galego) Esgotados os abonos Sinsal Son Estrella Galicia 15

Sorry, this entry is only available in Galician and European Spanish. For the sake of viewer convenience, the content is shown below in this site default language. You may click one of the links to switch the site language to another available language.

O prometido é débeda. Non queriamos rematar abril sen poñer a disposición do público os abonos para o Festival Sinsal Son Estrella Galicia 2017. Onte martes 18 de abril puxéronse á venda pola mañá en ticketea os abonos de 3 e 2 días para o festival do cartel secreto. Nun par de horas esgotáronse os abonos de tres días e pouco despois os de dous días. A organización do festival agradece moito o interese e paciencia de todos os compradores deste primeiro día de venda. O luns 24 saen á venda as entradas de día. Tamén en ticketea.

Do 21 ao 23 de xullo chegarán á illa de San Simón unha vintena de artistas e grupos de diferentes puntos xeográficos e musicais para formar parte dese cartel que só se coñece ao desembarcar. E atención á novidade 2017: o abono conxunto Sinsal Son Estrella Galicia e Milhões de Festa (Barcelos, Portugal). Un abono que permite disfrutar do Sinsal Son Estrella Galicia o venres 21, inclúe desprazamento a Barcelos esa mesma noite, con acceso dúas noites ao festival portugués. Os equipos dos dous festivais, tras un tempo falando de trascender a alianza natural e promover iniciativas conxuntas, dan o primeiro paso en 2017. Os obxectivos: sumar conexións entre as escenas musicais galega e portuguesa e constituír esta área de libre circulación festivaleira na que un mesmo bono permite a visita a dous eventos que distan 115 quilómetros entre si, aproximadamente. Haberá palco Milhões na illa de San Simón e palco Sinsal en Barcelos.

Unha das singularidades do Sinsal Son Estrella Galicia é que o cartel é secreto; si, o público non coñece quen vai actuar até que desembarca en San Simón. O aforo do festival está limitado a 800 persoas cada un dos días. É importante que o que hoxe podemos desfrutar nós, poda continuar no futuro. Por este e outros motivos, Sinsal Son Estrella Galicia afástase da idea de festival multitudinario, ofrecendo unha serie de actividades nun espazo natural onde o público e o seu benestar son un piar central do proxecto. Nas últimas dúas edicións as entradas esgotáronse semanas antes da súa celebración.

Sinsal Son Estrella Galicia é un festival patrocinado por Son Estrella Galicia e New Balance. Conta co apoio de Agadic-Xunta de Galicia, Concello de Redondela, Universidade de Vigo e Deputación de Pontevedra.